AHT Gelditu! Elkarlanak Lapurdiko herritarrek, igande honetan, Ingurumenaren aldeko elkarteen taldeak zortzi herritan antolatutako herri-kontsultetan adierazi duten Abiadura Handiko linea berriaren aurkakotasunaren irmotasuna txalotzen du.  "Biriatu, Urruña, Azkaine, Senpere, Ahetze,  Arbona, Arrangoitze, Basusarri eta St Martin de Seignaux udalerrietako bizilagunek emandako erantzuna eredugarria izan da, argi utzi baitute erabakian parte hartzeko duten borondatea, bai eta alferrikako, ulergaitz, hondatzaile eta ingurumena suntsitzen duen proiektutzat hartzen den herritarren aurkakotasun irmoa ere", dio elkarteak. Igande honetako galdeketek hauteskunde ofizialetatik gertu dagoen parte-hartze maila lortu dute eta herritarren gehiengo zabalak Abiadura Handiko Linea berriaren aurka bozkatu du. "Azpimarragarria iruditzen zaigu gaur arte jada 25 direla Euskal Herriko hainbat herritan AHTren inguruan egin diren herri-galdeketak: 2 Nafarroan, 10 EAEn eta 13 Lapurdin. Horietan guztietan, euskal gizartean, erabakietan inolako herritarren parte-hartzerik gabe inposatu nahi diguten proiektuaren aurrean aurkakotasuna zabala dela adierazi zen", jarraitzen dute.